Başy » Sözbaşy » 104-nji süre: «Hümeze» («Gybat edýänler»)
«Hümeze» süresi Mekgede inen sürelerden bolup, ol 9 aýatdan ybaratdyr. Süräniň ady ilkinji sürede agzalýan «Gybat edýän, ýaňsylaýan» manysynda bolan «Hümeze» sözünden alnandyr. Bu sürede ynsanlary ýazgarmagyň, aýyplamagyň erbetdigi, beýle iş edýänler üçin taýýarlanan dowzah odunyň aýylgançdygy beýan edilýär.
Rahman (Mähriban) we Rahym (Rehim- şepagatly) Allanyň ady bilen
1. (Ynsanlaryň) yzyndan gep-gybat edýänleriň, aýyplaýanlaryň, olary (köpçülikde göz-gaş kakyp) ýaňsylap, peseldýänleriň (kyýamat güni) waý hallaryna!
2. Ol (özüniň) ýygnan mal-mülküni sanar durar.
3. Ol (ýygnan bu) mal-mülki özüni ebedi ýaşadar öýder.
4. Ýok, beýle däl! Ol hökman Hutamä oklanar.
5. Sen Hutamäniň nämedigini näbiljek?
6. (Ol) Allanyň tutaşdyran odudyr.
7. Ol ot ýüreklere çenli ýetip (ony ýakar).
8. Bu ot olaryň (gybatkeşleriň) üstüne örtülendir.
9. (Özleri hem bu oduň içinde) uzyn sütünlere daňlandyr.